धर्म.....?

म,
म आस्तिक!
थोरै बुझेको छु
धर्म आस्था हो
विश्वास हो
मानवता हो
संस्कार हो
आशा हो
भरोसा हो
नियम हो
कानून हो
अनि,
मान्नेहरुको लागि
स्वर्ग र नर्कको बाटो छुट्याउँने
एउटा मापदण्ड पनि हो।
तर,
अलि परबाट चियाउँछु
धर्म,
धर्म स्वार्थ पनि रहेछ
धर्म लोभ पनि रहेछ
धर्म लालच पनि रहेछ
नत्र,
नत्र किन पो
ढोलक बहादुरहरु,
आफैलाई विश्वास गर्न छाडेर
आफनै नियम कानून तोड्दै
आफनो संस्कार,रितीरिवाज बिर्सेर
डेविड हुनुमा
रमाई रहेका छन्???
अझ अलिक परबाट चियाउँछु
धर्म,
धर्म परिबन्द पनि रहेछ
धर्म परिस्थिति पनि रहेछ
धर्म बाध्यता पनि रहेछ
नत्र,
नत्र किन पो?
अलिकति परतिर
अनिष खालिङ राईहरु
नचाहेर पनि
परिबन्दको भुमरी परी
अलिकति,
बाँच्ने रहर बोकेर
जीवनलाई,
घिसार्दै
थेचार्दै
निचोर्दै
अली अनिष हुन
वाध्य भइ रहेका छन्???